छ व्छान्‌ प्रान्तमा भूइंचालोको प्रतिरोध र उद्धार कार्य गर्ने कामको निर्देशन गरिरहनुभएका चीनका प्रधानमन्त्री वन् च्या पाउले भन्नुभए अनुसार पन्ध्र तारीख दिउँसो दुइ बजेसम्म स व्छान् प्रान्तमा गएको भूइंचालो प्रकोपग्रस्त क्षेत्रमा मर्नेहरुको संख्या उन्नाइस हजार पांच सय नौ पुगेको निश्चित भएको छ । तर पूर्व अडकल अनुसार मर्नेहरुको संख्या पचास हजारभन्दा बढी हुने सम्भावना रहेको छ । किनकि हालसम्म अझ बीस हजारजनाभन्दा बढी मानिसहरु भग्नावशेषमा पुरिएका छन् र धेरै मानिसहरु बेपत्ता भएका छन् ।

          पन्ध्र तारीख राति रेल-गाडीमा वन् च्या पाउले राज्य परिषद्‌को भूइंचालोको प्रतिरोध र उद्धार कार्यको निर्देशनालयको बैठक बोलाएर भन्नुभयोः स व्छान् प्रान्तको वन् व्छान् जिल्लामा गएको भूइंचालोको परिधि एक लाख वर्गकिलोमिटरभन्दा बढी रहेएको छ । वन् व्छान् जिल्लामा गएको भूइंचालोको तीव्रता सन् 1976 मा चीनको थांग शान्‌मा गएको भयंकर भूइंचालोभन्दा बढी रहेको छ । अहिलेको अवस्था हेर्दा यस पल्टको भूइंचालो नयां चीनको स्थापना भएदेखि सबैभन्दा भयंकर र प्रभावित क्षेत्र सबैभन्दा ठूलो रहेको भूइंचालो हो।

            हाल भूइंचालोको प्रतिरोध र उद्धार कार्य गर्ने संघर्षमा सहभागी भएका जन मुक्ति सेना , प्रहरी र रिजर्भ मिलिशियाको संख्या एक लाख बीस हजारभन्दा बढी रहेको छ । पन्ध्र तारीखका दिन चिनियां सेनाले अप्ठेरामा परेका कूल दश हजारभन्दा बढी मानिसहरुको खोजतलाशी गरेको र बचाएको छ। त्यस्तै तेह्र हजार घाइतेहरुको उपचार गरेको छ। यसका साथै प्रकोपबाट प्रभावित एक लाख बीस हजारभन्दा बढी वासिन्दाहरुलाई सारेको छ ।

            आज बिहानसम्म चीनको केन्द्रिय वित्त विभागले भूइंचालोको प्रतिरोध र उद्धारका लागि तीन अरब एक चालीस करोड चिनियां युआन्‌को रकम भुक्तानी गरेको छ । राष्ट्रभरमा माल र रकमको रुपमा प्राप्त चन्दाको परिमाण एक अरब तीस करोडभन्दा बढी पुगेको छ ।