नेपालको छिमेकी मुलुक चीनमा आगामी साताबाट सुरु हुने 29 औं गृष्मकालीन ओलम्पिकमा भाग लिनका लागि आज राति नेपाली टोली चीन प्रस्थान गर्दैछ। नेपाल ओलम्पिक कमिटिका महासचिव तथा राष्ट्रिय खेलकूद परिषदका सदस्यसचिव जीवनराम श्रेष्ठले सि.आर.आई.लाई बताउनु भए अनुसार नेपाली टोली काठमाडौँबाट ग्वाङ्चोउ हुँदै भोलि बेइजिङ्ग पुग्नेछ ।

              शिक्षा तथा खेलकूद मन्त्री प्रदीप नेपालको नेतृत्वमा 26 जनाको नेपाली टोलीले 29 औं गृष्मकालीन ओलम्पिकमा भाग लिँदैछ । 26 जनाको प्रतिनिधिमण्डलमा 8 जना खेलाडीहरु छन् भने अन्यमा प्रशिक्षक, स्वास्थ्यकर्मी तथा सरकारी अधिकारीहरु रहेका छन् । 8 जना खेलाडीले 6 वटा खेलमा भाग लिँदैछन् ।

             सन् 1964 मा जापानको टोकियोमा भएको 18 औं ओलम्पिकदेखि नेपालले भाग लिन थालेको हो । यो पटकको नेपालको ओलम्पिक यात्रा दुई कुराले अर्थपूर्ण रहेको पर्यवेक्षकहरुले बताउँछन् । नेपालको छिमेकी तथा घनिष्ट मित्रराष्ट्रमा ओलम्पिक आयोजना हुँदा नेपाललाई खुशी लागेको छ र यसबाट नेपाललाई प्रोत्साहन पनि मिलेको छ । नेपाली खेलाडीले राम्रो र कडा तयारी गरेको हुनाले पदक पाउने आशा पनि त्यतिकै रहेको कुरा सदस्यसचिव श्रेष्ठले बताउनुहुन्छ ।

              बेइजिङ्ग ओलम्पिकमा भाग लिने नेपाली खेलाडीहरुमा दिपक विष्ट, अर्जुन बस्नेत, करिष्मा कार्की, प्रशिद्धजंग शाह, चन्द्रकला थापा, कमलबहादुर अधिकारी, देवु थापा र फूलमाया क्याप्छाकी रहेका छन् । करिष्मा कार्की र प्रशिद्धजंग शाहले पौडी प्रतियोगितामा भाग लिँदैछन् भने भारत्तोलनमा कमलबहादुर अधिकारीले भाग लिँदैछन् । त्यसैगरी अर्जुन बस्नेत र चन्द्रकला थापा म्याराथुनमा भाग लिँदैछन् भने फूलमाया क्याप्छाकीले सुटिङ्गमा भाग लिँदैछिन् । देवु थापा जुडोमा भिड्नका लागि बेइजिङ्ग ओलम्पिकमा जाँदैछिन् भने दीपक विष्टले तेक्वान्डोमा भाग लिने भएका छन् ।

चेतनाथ आचार्य

सि.आर.आई.

काठमाडौँ