पैचिङ्गमा सञ्चालन भइरहेको अपाङ्गहरूको सबैभन्दा ठूलो खेलमेला पारा ओलम्पिक खेलकुदमा नेपालका एक मात्र खेलाडी जीतबहादुर खड्काले सन्तोषजनक प्रदर्शन गर्न सकेनन्। पैचिङ्गस्थित चीनको राष्ट्रिय रङ्गशाला बर्ड नेस्टमा हिजो अपराह्न भएको एथलेटिक्सअन्तर्गत् पुरुष 100 मिटर दौडको हिट चरणबाटै उनी बाहिरिए ।
उनको समूहमा सहभागी अन्य छ खेलाडीले सो दूरी 12 सेकेन्डभित्रै पूरा गरे पनि उनलाई भने 14.2 सेकेन्ड लागेको थियो। दौडको सुरुदेखि नै पछाडि परेका भए पनि अर्का एक खेलाडीको सहभागितालाई अमान्य ठहर्याएपछि उनी छैटौँ स्थानमा पर्न सफल भए।
नेपालले सहभागिता जनाएको एकमात्र खेलमा राम्रो प्रदर्शन गर्न नसकेकामा आफूलाई दुःख लागेको उनले बताए। खेलबाट बाहिरिएपछि राससका सम्वाददातालाई प्रतिक्रिया दिँदै उनले भनेः तर मैले प्रशिक्षक र प्रशिक्षणबिना राम्रो गर्न प्रयास भने गरेँ।
पारालम्पिक कमिटीले दिने वाइल्ड कार्डका आधारमा खड्का प्रतियोगिताका लागि छनोट भएका थिए। उनलाई हौसला दिन चीनका लागि कार्यवाहक नेपाली राजदूत निर्मलराज काफ्ले, दूतावास अधिकारी र पैचिङ्गमा रहेका नेपाली विद्यार्थी दिउँसो नै पारा ओम्पिक-ग्राम पुगेका थिए। पारालम्पिकमा नेपालको यो दोस्रो सहभागिता हो ।
सन् 2004 मा एथेन्समा आयोजित बाह्रौं पारा ओलम्पिक खेलकुदबाट नेपालले सहभागिता जनाउन सुरु गरेको हो ।
|