 चीन भ्रमणका लागि रक्षामन्त्री रामबहादुर थापा वादल आज साँझ काठमाडौँबाट चीन प्रस्थान गर्दैहुनुहुन्छ । चिनियाँ रक्षा मन्त्रालयको निमन्त्रणामा उहाँ चीन जान लाग्नु भएको हो । रक्षामन्त्री बादलको चीन भ्रमण एक साताको रहेको छ ।
संविधानसभाको निर्वाचनपछाडि गठित नयाँ सरकारका प्रधानमन्त्री पुष्पकमल दाहाल प्रचण्ड र सूचना तथा सञ्चार मन्त्री कृष्णबहादुर महराले नेपालको अशल छिमेकी मित्रराष्ट्र चीनको भ्रमण गरिसक्नुभएको छ । यसै सन्दर्भमा रक्षा मन्त्री बादलले आफू मन्त्री भएपछि पहिलो चोटी चीनको भ्रमण गर्दैहुनुहुन्छ । उहाँले चिनियाँ समकक्षी नेताहरुसँग दुई पक्षीय भेटवार्ता गर्नुहुनेछ ।
नेपालको शान्ति प्रक्रिया, संविधानसभाको निर्वाचन तथा त्यसपछाडि संविधान निर्माण प्रक्रियामा चीनले नेपाललाई सहयोग गर्दै आएको छ । प्रधानमन्त्री प्रचण्डको भ्रमणका क्रममा पनि नेपालको कोशी नदीमा बाँध भत्किएर भएको क्षतिप्रति चीन सरारकाले सहानुभूति स्वरुप सहयोग गर्ने बताइसकेको छ ।
रक्षा मन्त्री बादलले चीन भ्रमणका क्रममा चिनियाँ जनसेनाको कवाज पनि अवलोकन गर्नुहुनेछ । चिनियाँ जनसेना संसारकै सबैभन्दा ठूलो सेना हो । चीन भ्रमणका क्रममा रक्षामन्त्री बादलले महत्वपूर्ण तथा ऐतिहासिक चिनियाँ स्थानको अवलोकन पनि गर्नुहुनेछ । उहाँले अध्यक्ष माओत्सेतुङ्गको शव भवनको अवलोकन, ग्रेटवालको अवलोकन तथा अन्य सांस्कृतिक सम्पदाको अवलोकन गर्नुहुनेछ ।
नेपाली सेनालाई लोकतान्त्रिकरण गर्न तथा चीनबाट नेपाली सेनाका लागि अत्याधुनिक प्राविधिक सहयोग जुटाउने क्रममा पनि रक्षामन्त्रीको यो चीन भ्रमण महत्वपूर्ण हुने ठानिएको छ ।
चेतनाथ आचार्य
सि.आर.आई.
काठमाडौँ
|
