चीनका राष्ट्राध्यक्ष हु चिन थाउ अमेरिका तथा युरोपको भ्रमण सफलताका साथ समाप्त गरी आज स्वदेश फिर्ता हुनुभएको छ।

            राष्ट्राध्यक्ष हु चिन थाउको अमेरिका तथा यूरोपको भ्रमण यस महिनाको चौध तारिखदेखि शुरु भएको थियो। भ्रमणका अवधिमा उहाँ अमेरिकामा आयोजित बीस मुलुक समूहका नेतागणका लागि बैंकिङ बजार तथा विश्व-अर्थतन्त्रको शिखर सम्मेलनमा भाग लिनुका साथै पेरुको राजधानी लिमामा आयोजित एशिया प्रशान्त आर्थिक सहयोग संगठनको सोह्रौं अनौपचारिक शिखर सम्मेलनमा पनि उपस्थित हुनुभएको थियो। यसका साथै उहाँले कोस्टारिका, क्युबा, पेरु तथा ग्रिस गरी चार मुलुकको राजकीय भ्रमण गर्नुभएको छ।