 नेपालका लागि चिनियाँ राजदूत छ्वु कोहोङ्गलाई स्वागत गर्दै नेपाल चाइना फ्रेण्डशीप युथ एसोसिएसनले दुई देशबीचको मैत्री सम्बन्धमा युवा सहभागितलाई प्रोत्साहन गर्ने भएको छ । आगामी जनवरी 6 तारिख काठमाडौँमा एक अन्तक्रिया कार्यक्रमको आयोजना गरी दुई देशबीचको मैत्री सम्बन्धमा युवाको भूमिका खोजिन लागेको हो।
नेपाल चाइना फ्रेण्डशीप युथ एसोसिएनका अध्यक्ष प्रकाशबाबु पौडेलले सि.आर.आई.लाई बताउनु भए अनुसार सबै राजनीतिक पार्टीका युवा संगठनका प्रमुख तथा प्रतिनिधिहरुलाई सहभागी गराएर सो अन्तक्रियाको आयोजना गर्न लागिएको छ।
एक महिना अगाडि मात्र नेपालका लागि राजदूत नियुक्त भएर आएपछि कोहोङ्गसँग नेपालका मुख्य राजनीतिक दलका युवा संगठनका प्रमुखहरुसँगको छलफल तथा अनुभव आदानप्रदानले दुरगामी प्रभाव छोड्ने हुनाले यस प्रकारको कार्यक्रमको आयोजना गर्न लागिएको अध्यक्ष पौडेलले बताउनुभयो । पौडेलका अनुसार नेपालको भूमि प्रयोग गरेर हुने चीन विरोधी गतिविधिलाई निस्तेज बनाउका लागि नेपाली युवा परिचालन अति आवश्यक छ। त्यसकारण दुई देशबीचको मैत्री सम्बन्धमा युवा सहभागिता तथा प्रतिनिधिमण्डलको आदानप्रदान गराएर संयुक्त कार्यक्रम ल्याउन आवश्यक छ।
नेपाल सरकारले एक चीनको नीतिलाई स्वीकार गरी चीन बिरोधी गतिविधि हुन नदिने प्रतिवद्धता व्यक्त गरे पनि समय समयमा हुने चीन बिरोधी गतिविधिको सबै राजनीति दलका युवा संगठनहरुले बिरोध गरेमा जनस्तरबाट नेपाल र चीनबीचको मैत्री सम्बन्ध अझ मजबुत हुने एसोसिएसनले ठहर गरेको छ । सोही अनुसार दुई देशबीचको मैत्री सम्बन्धमा युवाहरुको भूमिकालाई प्रोत्साहन गर्ने तथा सहभागिता बढाउनका लागि नयाँ राजदूतसँग बसेर सँगै जाने बारेमा छलफल गर्नु नै कार्यक्रमको प्रमुख उद्देश्य रहेको अध्यक्ष पौडेलले बताउनुभयो ।
चेतनाथ आचार्य
सि.आर.आई.
काठमाडौँ
|
