दस सदस्यीय चिनियाँ प्रतिनिधिमण्डलको नेतृत्व गर्दै नेपाल भ्रमणका क्रममा हिजो काठमाडौँ आइपुग्नु भएका चिनियाँ सहायक वाणिज्य मन्त्री चङ्ग सानले प्रधानमन्त्री पुष्पकमल दाहाल प्रचण्डसँग भेट गर्नु भएको छ । आज प्रधानमन्त्री निवास वालुवाटारमा भएको भेटघाटमा दुई पक्षीय सहयोगका बारेमा छलफल भएको चिनियाँ दूतावासले जनाएको छ ।

              प्रधानमन्त्री प्रचण्डले चिनियाँ सहायक वाणिज्य मन्त्रीसँग नेपाल र चीनबीचको वाणिज्य विकास, नेपालमा चिनियाँ लगानी संयुक्त रुपमा जलविद्युत उत्पादन आदि विषयमा प्रस्ताव राख्नुभएको छ । नेपालको अत्यन्त भरपर्दो अशल छिमेकी राष्ट्र चीनले गरेको आर्थिक सहयोगले विकास निर्माणमा मेरुदण्डको काम गरेको बताउँदै प्रधानमन्त्री प्रचण्डले स्थाइ शान्ति र दिगो विकासका लागि थप सहयोग गर्न आग्रह गर्नुभएको छ ।

             प्रत्युत्तरमा चिनियाँ सहायक वाणिज्य मन्त्री सानले सकारात्मक अभिव्यक्ति दिनुभएको छ । उहाँले नेपालमा चिनियाँ लगानी भित्र्याउनका लागि सरल करप्रणाली, लगानी ग्यारेन्टी तथा पारदर्शी मापदण्ड हुनुपर्ने कुरमा पनि जोड दिनुभएको छ । नेपाललाई दिइँदै आएको सहयोगलाई बढाउँदै लगिने र विकासका पूर्वाधारमा चीनले विनासर्त सहयोग गर्ने कुरा पनि उहाँले सो अवसरमा व्यक्त गर्नुभएको छ ।

             प्रधानमन्त्री प्रचण्डले नेपाल सँधै एक चीनको नीतिमा प्रतिवद्ध रहेका र छिमेकी मुलुकसँगको मैत्री सम्बन्धमा आँच पुग्ने गतिविधि हुन नदिन वर्तमान सरकार गम्भीर रहेको बताउँदा चिनियाँ सहायक वाणिज्य मन्त्रीले धन्यवाद ज्ञापन गर्नुभएको छ ।

             चिनियाँ सहायक वाणिज्यमन्त्री सान आगामी बिहिबार चीन नेपाल भ्रमण सिध्याएर चीन फर्कनु हुनेछ । उहाँले नेपाल भ्रमणका क्रममा अर्थमन्त्री डा. बाबुराम भट्टराई तथा आपूर्ति मन्त्री राजेन्द्र महतो लगायत उच्च अधिकारीहरुसँग पनि भेट गर्ने कार्यक्रम रहेको छ ।

चेतनाथ आचार्य

सि.आर.आई.

काठमाडौँ