झण्डै तीनवर्ष अगाडि काठमाडौँ ग्वाङ्‍चाउ उडान गर्दै आएको चाइना साउथन एयर लाइन्सको व्यवसाय उत्साहजनक रुपले अगाडि बढिरहेको छ। एयर लाइन्सको काठमाडौँ कार्यालयका महाप्रवन्धक भिमसेन्ट चेनले सि.आर.आई.लाई बताउनु भएअनुसार अघिल्ला मार्च र अपि्रल महिनामा आशा गरेभन्दा राम्रो व्यवसाय गर्न एयरलाइन्स सफल भएको छ।

         उडान सुरु गर्दा साताको दुईपल्ट उडान तालिका थियो भने पछि यसलाई बढाएर हप्ताको तीनपल्ट उडान तालिका बनाइएको थियो। गत वर्षको मार्चदेखि काठमाडौँमा भएका चीन बिरोधी गतिविधिका कारण एयर लाइन्सले आफ्‍नो उडान तालिकालाई घटाएर पुन दुईपल्ट गराएको छ। हाल प्रत्येक सोमबार र शुक्रबार काठमाडौँ ग्वाङ्‍चाउ उडान हुँदै आएको छ।

          महाप्रवन्धक भिमसेन्टका अनुसार अहिलेको उत्साहजनक व्यवसायका कारण आगामी जुनको 29 तारिखदेखि हप्ताको तीनपल्ट उडान गर्ने योजना एयरलाइन्सले बनाएको छ। जुन 29 देखि प्रत्येक सोमबार, बुधबार र शुक्रबार काठमाडौँ ग्वाङ्‍चाउ उडान हुनेछ। जुलाई र अगष्ट महिनामा चीनमा विद्यालयहरु विदा हुने हुनाले नेपाल घुम्ने चिनियाँ पर्यटकको चापलाई ध्यानमा राखेर हप्ताको तीनपल्ट उडान बनाउन लागिएको भिमसेन्टले बताउनुभयो।

         चालु महिनाको पहिलो सातामा पनि एयरलाइन्सको व्यापार उत्साहजनक रहेको छ। प्राय सबै उडानका यात्री पूर्ण हुने भएकाले र आगामी दिनमा यो क्रम अझै बढ्‍न संभावना रहको पनि भिमसेन्टले बताउनुभयो।

चेतनाथ आचार्य

सि.आर.आई.

काठमाडौँ