प्रत्येक दुई वर्षको अन्तरालमा आयोजना हुने दक्षिण एसियाली राष्ट्रहरुको औद्योगिक तथा व्यापारिक मेलामा नेपालका 21 जना प्रतिनिधिहरुले भाग लिने भएका छन्। चीनको वाणिज्य मन्त्रालयले आयोजना गर्ने यो मेला आगामी जुन महिनाको 6 देखि 10 तारिखसम्म सञ्चालन हुनेछ। चीनको दक्षिणपूर्वमा रहेको सुन्दर पर्यटकीय सहर खुन्मिङ्गमा आयोजना हुने यस मेलामा नेपालका सरकारी प्रतिनिधि र निजी क्षेत्रका व्यवसायीहरु सहभागी रहनेछन्।

          नेपाल चीन कार्यकारी परिषदका अध्यक्ष अनुपरन्जन भट्टराईले सि.आर.आई.लाई बताउनु भए अनुसार सो मेलामा भाग लिनका लागि उद्योग मन्त्रालयका सचिव पुरुषोत्तम ओझाको नेतृत्वमा नेपाली प्रतिनिधिमण्डल जुन 4 तारिख चीन प्रस्थान गर्नेछ। सो प्रतिनिधिमण्डलमा नेपाल चीन कार्यकारी परिषदका अध्यक्ष, उद्योग मन्त्रालयबाट अन्य तीनजना अधिकारी र निजी क्षेत्रबाट 16 जना व्यवसायीहरु सम्मिलित रहनेछन्।

          मेलामा नेपालको तफबाट 18 वटा प्रदर्शनी कक्षहरु रहने पनि भट्टराईले बताउनुभयो। नेपाली व्यवसायीहरुले हस्तकलाका सामानहरु, पस्मिना, फर्निचर तथा काठका सामानहरु, नेपाली कागजका उत्पादन आदि प्रदर्शनीमा राख्ने भएका छन्। दुई वर्ष अगाडि चीनमा आयोजना भएको सोही मेलामा नेपालले पहिलोपल्ट भाग लिएको थियो। त्यसपछि नेपाल र चीनबीचमा व्यापार बढेकाले नेपाली उद्योगी व्यवसायीहरु अझै उत्साही भएको भट्टराईले दावी गर्नुभयो।

          नेपाली उत्पादनलाई चीनमा बजार विस्तार गर्नु मेलामा भाग लिनुको प्रमुख उद्देश्य रहे पनि यसले अन्य क्षेत्रबाट पनि दुई देशबीचको सम्बन्ध विस्तार हुने उहाँको भनाइ छ।

चेतनाथ आचार्य

सि.आर.आई.

काठमाडौँ