दुई महिना अगाडिदेखि सेवा सञ्चालन गर्दै आएको निजामति सेवा अस्पतालको उद्घाटन भएको छ । चिनियाँ सहयोगबाट बनेको सो अस्पतालको गत शनिबार बिहान प्रधानमन्त्री माधवकुमार नेपालले उद्घाटन गर्नु भएको हो।

             अस्पताल उद्घाटन गर्दै प्रधानमन्त्री नेपालले नेपालको विकासमा चिनियाँ सहयोगको खुलेर प्रशंसा गर्नुभयो । प्रधानमन्त्री नेपालले भन्नुभयो "अब यो अस्पतालमा उपचार गर्न आउने हरेक नेपाली निजामति कर्मचारीहरुले चिनियाँ सहयोगको अनुभूति गर्नेछन् ।" उहाँले नेपाल सरकारले सदैव एक चीनको नीति लिएको बताउँदै युगौँदेखि नेपाल र चीनबीचको सम्बन्ध अत्यन्त सुमधुर रहेको उल्लेख गर्नुभयो।

             उद्घाटन समारोहलाई सम्बोधन गर्दै नेपालका लागि चिनियाँ राजदूत छ्वु कोहोङ्गले चीनले सधैँ नेपाल र नेपालीको हितमा काम गर्ने बताउनभुयो । उहाँले अस्पतालको निर्माण गरेर चिनियाँ सरकारले नेपाललाई हस्तान्तरण गरिसकेको बताउँदै नेपालीको असल स्वास्थ्यको कामना गर्नुभयो।

             एक सय 32 शैयाको अस्पताल गतवर्ष निर्माण कार्य सम्पन्न भएको थियो । नेपालभर कार्यरत 80 हजार निजामति सेवामा कर्मचारी र आश्रित परिवारले सहुलियत दरमा यस अस्पतालबाट उपचार प्राप्त गर्नेछन् । अस्पताल निर्माण गर्नका लागि सामान्य प्रशासन मन्त्रालय र चीन सरकारबीच तीनवर्ष अगाडि सम्झौता भएको थियो । काठमाडौँको मीनभवनमा 60 रोपनी जग्गाको क्षेत्रफलमा रहेको यो अस्पताल निर्माण सम्पन्न भई सन् गत वर्षको अक्टोबर 27 मा चीन सरकारले नेपाल सरकारलाई हस्तान्तरण गरेको थियो । अस्पतालको निर्माण गर्नका लागि चीन सरकारले नेपाल सरकारलाई 65 करोड 17 लाख रुपैयाँ अनुदान सहयोग गरेको छ ।

चेतनाथ आचार्य

सि.आर.आई.

काठमाडौँ