गत मे महिनामा नेपाल भित्रिने पर्यटकहरुको संख्यालाई गत वर्षको मे महिनासँग तुलना गर्दा सरदर 5 प्रतिशतले घटेको पाइन्छ । सबै देशबाट नेपाल घुम्ने पर्यटकहरु घटिरहेको अवस्थामा चिनियाँ पर्यटकहरु भने उल्लेख्य रुपमा बढेका छन् ।

             नेपाल पर्यटन बोर्डले सि.आर.आई.लाई उपलब्ध गराएको तथ्या अनुसार गत मे महिनामा 7 सय 72 जना चिनियाँ पर्यटकहरु नेपाल घुम्न आएका छन् । गत वर्षको मे महिनामा नेपाल भित्रिने चिनियाँ पर्यटकको संख्या 5 सय 67 मात्र थियो । यो तथ्यालाई तुलनागर्दा गत वर्षभन्दा यो वर्षको मे महिनामा नेपाल घुम्ने चिनियाँ पर्यटकको संख्यामा 36 प्रतिशतभन्दा बढीले वृद्धि भएको छ ।

             गत वर्ष 2008 को सुरुको पाँच महिनामा नेपाल भित्रिने चिनियाँ पर्यटकभन्दा चालु वर्षको सोही अवधिमा झण्डै तीन प्रतिशत बढी चिनियाँ पर्यटकहरु नेपाल घुम्न आएका छन् । गत वर्षको जनवरीदेखि मे महिनासम्ममा 6 हजार 4 सय तीनजना चिनियाँ पर्यटकहरु नेपाल घुम्न आएका थिए भने चालु वर्षको सोही अवधिमा 6 हजार 5 सय 83 जना चिनियाँ पर्यटकहरु नेपाल घुम्न आएका छन् ।

              नेपाल घुम्न चाहने चिनियाँ पर्यटकहरु नियमित रुपमा बढिरहेकाले ग्वाङचाउ काठमाडौँ उडान गर्दै आएको चाइना साउथन एयरलाइन्सले यही महिनाको 29 तारिखदेखि उडान थप गर्ने भएको छ । एयरलाइन्सका महाप्रवन्धक भिमसेन्ट छेनले सि.आर.आई.लाई बताउनु भए अनुसार चालु वर्षमा नेपाल घुम्ने चिनियाँ पर्यटक बढेकै कारणले चाइना साउथनले आशा गरेभन्दा राम्रो व्यापार गर्न सफल भएको छ ।

चेतनाथ आचार्य

सि.आर.आई.

काठमाडौँ