 चिनियाँ राजदूत छ्वु कोहोङ्गले नवनियुक्त परराष्ट्रमन्त्री सुजाता कोइरालासँग भेटवार्ता गर्नु भएको छ । हिजो 8 तारिख सोमबार चिनियाँ राजदूत छ्वु मन्त्री कोइरालालाई भेट्न उहाँको कार्यकक्ष परराष्ट्रमन्त्रालय नारायणहिटीमा जानु भएको थियो ।
सुजाता कोइराला परराष्ट्रमन्त्रीमा गत साता नियुक्त भएपछि चिनियाँ राजदूतसँग उहाँले पहिलोपल्ट भेट गर्नु भएको हो । दुवै नेताबीचमा अत्यन्त सौहार्दपूर्ण वातावारणमा शिष्टाचार भेट भएको थियो ।
भेटघाटका क्रममा चिनियाँ राजदूत छ्वुले परराष्ट्र मन्त्री कोइरालालाई बधाई दिनुभयो । चिनियाँ सरकार र चिनियाँ विदेश मन्त्रीको तफबाट बधाई तथा शुभकामना दिँदै उहाँको कार्यकालमा चीन र नेपालबीचको मैत्री सम्बन्ध अझै मजबुत हुने आशा प्रकट गर्नुभयो ।
परराष्ट्रमन्त्री कोइरालाले नेपालले सधैँ एक चीनको नीतिलाई समर्थन गरेको बताउँदै नेपालको भूमि चीन बिरोधी गतिविधिमा प्रयोग हुन नदिन प्रतिवद्ध रहेको बताउनुभयो । नेपालले दुवै छिमेकी मुलुक चीन र भारतसँग उत्तिकै सम्बन्ध स्थापना गरेको प्रसङ्ग उल्लेख गर्दै भविष्यमा पनि यो परम्परा कायम रहने परराष्ट्रमन्त्र कोइरालाले राजदूत छ्वुलाई विश्वास दिलाउनुभयो ।
चेतनाथ आचार्य
सि.आर.आई.
काठमाडौँ
|
