प्रधानमन्त्री तथा मन्त्रीपरिषदको कार्यालयका सचिव लीलामणि पौडेल एकहप्ते चीन भ्रमण सिध्याएर आज काठमाडौँ फर्कनुभयो। उहाँ सि.आर.आई.द्बारा सञ्चालित सुन्दर तिब्बत पर्यटनसम्बन्धी ज्ञानविज्ञान प्रतियोगिताबाट पुरस्कृत भएर गत जुन 30 तारिखका दिन चीनको स्वायत्त प्रदेश तिब्बतको भ्रमणमा जानु भएको थियो ।

            उहाँसँगै अन्य विभिन्न देशका 6 जना श्रोताहरुले पनि सो प्रतियोगिताबाट पुरस्कृत भएर चीनको स्वायत्त प्रदेश तिब्बतको भ्रमण गर्ने अवसर पाएका थिए । सचिव पौडेलले सन् 2003 देखि सन् 2007 सम्म चीनको स्वायत्त प्रदेश तिब्बतका महावाणिज्यदूत भएर कुटनीतिक क्षेत्रमा समेत सेवा पुर्याइसक्नु भएको छ । चारवर्ष ल्हासामा बसिसक्नु भएका सचिव पौडेल आफूले ल्हासा छोडेको दुई वर्षमै ठूलो परिवर्तन भएको बताउनुहुन्छ । उहाँले सि.आर.आई.सँग कुरा गर्दै भन्नुभयो "चीनको स्वायत्त प्रदेश तिब्बतमा विज्ञान प्रविधि, कृषि, शिक्षा तथा आर्थिक विकासले जनतालाई अत्यन्त खुशी बनाएको मैले पाएँ ।"

            चिनियाँ अन्तर्राष्ट्रिय रेडियो सि.आर.आई. र चिनियाँ कम्युनिष्ट पार्टी अन्तर्गत तिब्बत स्वायत्त प्रदेश शाखाको प्रचारप्रसार मन्त्रालयारा संयुक्त रुपमा आयोजित सुन्दर तिब्बत ज्ञानविज्ञानसम्बन्धी प्रतियोगिता गत अप्रिल 20 तारिखदेखि मे 31 तारिखसम्म सञ्चालन गरिएको थियो । प्रतियोगितामा तिब्बती संस्कृति, पर्यटन, चाडपर्व, रहनसहन, प्राकृतिक आदि विषयमा समग्र परिचय दिनसक्ने सामग्रीहरु प्रस्तुत गरिएको थियो । नेपाली भाषा बाहेक अंग्रेजी, फेन्च, चेक, हिन्दी, जर्मन र स्पेन भाषामा सञ्चालन गरिएको सो प्रतियोगितामा सि.आर.आई. रेडियोको अनलाइन सेवामाफत विश्वभरका लाखौँ श्रोताहरुले भाग लिएका थिए ।

           आफू सि.आर.आई.द्बारा पुरस्कृत भएर नेपाल र चीनबीचको मैत्री कार्यमा थप प्रोत्साहित भएको बताउँदै रेडियोले आयोजना गरेको प्रतियोगिता उत्कृष्ट र संसारभरका श्रोतालाई तिब्बतबारेमा सही जानकारी दिने रहेको उहाँले बताउनभुयो ।

चेतनाथ आचार्य

सि.आर.आई.

काठमाडौँ