नेपाल र चीनबीच कुटनीतिक सम्बन्ध स्थापना भएको 54औं वार्षिकोत्सवका अवसरमा चिनियाँ दूताबासले विशेष कार्यक्रमको आयोजना गर्ने भएको छ।

           चिनियाँ दूताबासको संस्कृति विभागका प्रमुख फान गोपिङ्गले सि.आर.आई.लाई बताउनु भए अनुसार 31 तारिख बेलुका रात्रिभोजको आयोजना गरी दुई देशबीच स्थापना भएको कुटनीतिक सम्बन्धको 54औं वार्षिकोत्सव मनाउन लागिएको हो।

           दूताबासभित्रको चिनियाँ सैनिक सम्पर्क शाखाको आयोजनामा हुने सो कार्यक्रममा नेपाल सरकारका प्रधानमन्त्री, मन्त्रीहरु, संविधानसभाका अध्यक्ष तथा उच्च तहका नेताहरुलाई आमन्त्रण गरिएको छ। नेपाली सेनाका प्रधानसेनापति तथा सैनिक उच्च अधिकारीहरुलाई पनि कार्यक्रममा सहभागी हुनका लागि निमन्त्रणा गरिएको छ। त्यसैगरी नेपालस्थित विदेशी कुटनीतिक नियोगका प्रमुखहरु, पत्रकार तथा विभिन्न पेशाका व्यक्तिहरु पनि कार्यक्रममा सहभागी हुने चिनियाँ दूताबासले जनाएको छ। नेपालका लागि चिनियाँ राजदूत छ्‍वु कोहोङ्ग हाल चीनमा रहनु भएको भए पनि उहाँ 30 तारिख काठमाडौँ फर्कनु हुनेछ।

          चीनले नेपालसँगको सम्बन्धलाई सँधै उच्च महत्वका साथ हेरेको र दुई देशबीच औपचारिक रुपमा स्थापित कुटनीतिक सम्बन्धलाई पनि एउटा ऐतिहासिक महत्वका रुपमा लिइएको दूताबासको संस्कृति विभागका प्रमुख फानले बताउनुभयो।

          चिनियाँ दूताबासले आयोजना गर्ने सो रात्रिभोजको कार्यक्रममा 30 तारिखदेखि नेपाल भ्रमणमा रहने चिनियाँ अन्तर्राष्ट्रिय रेडियोको प्रतिनिधिमण्डल पनि सहभागी रहनेछ।

चेतनाथ आचार्य

सि.आर.आई.

काठमाडौँ