नेपाली भूमिबाट हुनसक्ने चीन बिरोधी गतिविधि तथा अवैध व्यापारकारोबार रोक्नका लागि सीमा क्षेत्रमा सशस्त्र प्रहरी परिचालन गर्न लागिएको हो । नेपाल र चीनबीचको सम्बन्ध युगौँदेखि सुमधुर रहेको र भविष्यमा पनि यसलाई जारी राख्नका लागि सम्बन्धमा आउने अप्ठ्यारा र समस्यामाथि नियन्त्रण गर्न आवश्यक छ । नेपालको भूमिबाट दलाई गुटले चीनबिरोधी क्रियाकलाप सञ्चालन गर्ने र चीनको स्वायत्त प्रदेश तिब्बत प्रवेश गर्न खोजेको कुराले पनि दुई देशबीचको सीमामा सुरक्षा व्यवस्था कडा बनाउन पर्ने आवश्यकता महशुस गरिदै आएको छ ।

         सशस्त्र प्रहरीको झन्डै 12 हजार जनशक्तिलाई सरकारले अहिले भारतसँग सीमा जोडिएको 18 जिल्लामा सीमा अपराध तथा अवैध चोरीपैठारी नियन्त्रणका लागि परिचालन गरेको छ । नेपालले दुवै छिमेकी मुलुकसँग समान दुरीमा सम्बन्ध बढाउने उद्देश्यले अब भारतसँगको सीमामा जस्तै चीनसँगको सीमामा पनि सशस्त्र प्रहरीबल स्थापना गर्न लागेको हो ।

         गृहमन्त्रालयले सि.आर.आई.लाई जानकारी दिए अनुसार चीन सरकारले सिमानामा तैनाथ हुने सशस्त्र प्रहरीबलका लागि आवश्यक भौतिक सामग्रीसमेत सहयोग स्वरुप उपलब्ध गराउने छ ।

        नेपाल र चीनको स्वायत्त प्रदेश तिब्बतबीच सीमा जोडिएका मुस्ताङ, सोलुखुम्बु, रसुवा, हुम्ला, संखुवासभा, दोखला, ताप्लेजुङ्ग र सिन्धुपाल्चोक जिल्लाका उत्तरी सीमा क्षेत्रमा सशस्त्र प्रहरी बल रहन सक्ने मन्त्रालयले बताएको छ ।

        चेतनाथ आचार्य

        सि.आर.आई.

        काठमाडौँ