भोलिदेखि चीनको राजधानी बेइजिङ्गमा सुरु हुने दक्षिण एसियाली राष्ट्रहरुमा सञ्चालित चिनियाँ मैत्री संघहरुको सम्मेलनमा भाग लिनका लागि नेपाली प्रतिनिधिहरु हिजो काठमाडौँबाट चीन बेइजिङ्ग प्रस्थान गरेको छन् । बेइजिङ्गमा आयोजना हुने सो सम्मेलनमा नेपालका विभिन्न चारवटा संस्थाले भाग लिएका छन् ।
बेइजिङ्ग प्रस्थान गगर्नुपूर्व त्रिभुवन अन्तर्राष्टि्रय विमानस्थलमा सि.आर.आई.सँग कुरा गर्दै नेपाल चीन युवा मैत्री संघका अध्यक्ष प्रकाशबाबु पौडेलले सम्मेलनमा नेपालको उपस्थिति महत्वपूर्ण रहने बताउनुभयो । अध्यक्ष पौडेलका अनुसार दक्षिण एसियामा चीनको संस्कृति र चिनियाँ भाषाको विस्तार गरी जनतासम्म मैत्री सम्बन्धलाई पुर्याउनु सम्मेलनको प्रमुख उद्देश्य रहेको छ । चीनसँग असल सम्बन्ध राख्ने दक्षिण एसियाली राष्ट्रहरुबीचको अनुभव आदानप्रदान तथा मैत्री भावनालाई साझा मञ्चबाट उठाएर अन्तर्राष्टि्रय मैत्री भावनाको विकास गराउने सम्मेलनको दोस्रो उद्देश्य रहेको अध्यक्ष पौडेल बताउनुहुन्छ ।
नेपालबाट नेपाल चीन युवा मैत्री संघका अतिरिक्त अरनिको समाज, नेपाल चीन समाज र नेपाल चीन कार्यकारी परिषदका दुई दुईजना पदाधिकारीले सो सम्मेलनमा भाग लिँदैछन् । नेपाल र चीनबीचको मैत्री सम्बन्धलाई जनस्तरसम्म पुर्याउन दर्जनौँ संघसंस्थाहरु सक्रिय रहेका छन् । सामाजिक क्ष्ोत्रमा विभिन्न कार्यक्रमहरु सञ्चालन गर्दै आएका ती संस्थाहरुले आ-आफ्नो गतिविधिलाई समेत बेइजिङ्गमा आयोजित सो सम्मेलनमा प्रस्तुत गर्नेछन् ।
चीनको राजधानी बेइजिङ्गमा पहिलो चोटि आयोजना हुँदै गरेको सो सम्मेलनमा नेपालका अतिरिक्त भारत, वंगलादेश, पाकिस्तान र श्रीलंकाका विभिन्न मैत्री संघहरुले भाग लिँने भएको छन् ।
चेतनाथ आचार्य
सि.आर.आई.
काठमाडौँ
|