बडादसैंको अवसर पारेर नेपाल स्याटलाइट टेलिकम प्रालि एनएसटीले असोज दोस्रो सातादेखि जीएसएम प्रविधिमा आधारित टेलिफोन सेवा ग्राहकसमक्ष ल्याउने भएको छ ।एनएसटीद्वारा हालै राजधानी पत्रकार सम्मेलनमा बोल्दै अध्यक्ष अस्मिता सुमार्गीले पहिलो चरणमा टेलिफोन सेवा नपुगेका मध्यपश्चिमाञ्चल क्षेत्रका विद्युत् तथा सडक नभएका अति विकट गाविसमा सेवा सुरू गर्ने बताउनुभयो ।

           दीपावलीपछि व्यावसायिक सेवाको सुरूआत गरिन लागिएको सो कम्पनीले मध्य पश्चिमाञ्चलका 273 वटा गाविसबाट सुरू गरी क्रमशः नेपालभर पुर्याउने भएको छ ।अहिले प्राविधिक र प्रशासनिक गरी 160 नेपाली जनशक्ति प्रत्यक्ष संलग्न सो सेवाको प्रथम चरणका लागि लागि अनुमानित लागत 25 मिलियन अमेरिकी डलर रहेको सो अवसरमा जानकारी गराइयो ।

           नेपाल दूरसञ्चार प्राधिकरणबाट 2064 साल फागुनमा सेवा सञ्चालन गर्न स्वीकृति पाए लगत्तै पूर्वाधार निर्माणका काम प्रारम्भ गरेको एनएसटीले 19 महिनामा नेपालका अति दुर्गम पहाडी क्षेत्रबाट घोषित लक्ष अनुसार सेवा सुरू गर्न लागेको अध्यक्ष सुमार्गीले जानकारी गराउनुभयो ।एनएसटीलाई दूरसञ्चार प्राधिकरणले 96 नम्बर दिएको छ भने त्यसमा सञ्चालनको सुरू नम्बर ३ हुनेछ जस अनुसार सञ्चालन नम्बर 963 सहित 10 अङ्कमा टेलिफोन सेवा सञ्चालन हुने बताइयो ।

           राजधानी बाहिर मुख्य स्टेसन राखेर राजधानीबाटै सेवा सुरू गर्ने निजी क्षेत्रको पहिलो लगानीबाट सञ्चालित कम्पनीले हातहातमा मोबाइलसेट घरघरमा इन्टरनेटु अवधारणालाई मध्य पश्चिमका जनताले कार्यरूपमा ल्याउन पाउने बताइएको छ ।एनएसटीका कार्यकारी निर्देशक अजयराज सुमार्गीले पूर्वाधार तयारीको क्रममा हाल मध्य पश्चिमाञ्चलका 15 वटा जिल्लामा 68 वटा टावरबाट सेवा सुरू गरिने सो कम्पनीको स्तरीय र विश्वसनीय हुने दाबी गर्नुभयो । त्यस अवसरमा उहाँले निकट भविष्यमा अन्तर्राष्ट्रिय गेटवे, सीडीएमए सेवा पनि सुरू गर्ने योजना रहेको जानकारी गराउनुभयो ।