यसका अतिरिक्त, स्थानीय सरकार तथा सम्बन्धित विभागहरुले सर्वसाधारणहरुलाई सम्बन्धित कानून तथा नियमबारे पनि जोडतोडका साथ जानकारी दिइरहेका छन। सगरमाथा प्राकृतिक आरक्षण क्षेत्र व्यवस्थापन समिति अन्तर्गत तिंगरी शाखाका प्रमुख फुपुचासीले यस सम्बन्धमा जानकारी दिंदै भन्नुभयोः

                "हामीले प्रतिवर्ष वातावरण संरक्षण सम्बन्धी प्रचार-प्रसार कार्यक्रमको आयोजना गर्नेगरेका छौं। सगरमाथा क्षेत्रको पर्यावरणीय वातावरणको संरक्षणका माध्यमबाट जंगली जनावरहरुको बासस्थानको संरक्षण गर्नका लागि हामीले वन-जंगल सम्बन्धी कानून, जंगली जनावरको संरक्षण कानून तथा प्राकृतिक संरक्षण क्षेत्र सम्बन्धी नियम आदि नियम-कानूनहरुलाई तिब्बती भाषामा अनुवाद गरेर स्थानीय सर्वसाधारणलाई बाँडेका छौं।"

                  हरेक वर्ष दश हजारभन्दा बढी व्यक्तिहरु पर्वतारोहण, पर्यटन वा वैज्ञानिक सर्भेक्षणका लागि सगरमाथा पुग्ने गर्दछन। तिनीहरुले सगरमाथा क्षेत्रमा थुप्रै फोहर पनि फ्याँकेका छन। यस समस्याको समाधान गर्नका लागि सगरमाथा प्राकृतिक आरक्षण क्षेत्र व्यवस्थापन समितिले केही आवश्यक कदमहरु चालेको छ। यसबारे जानकारी दिंदै श्री फुपुचासीले भन्नुभयोः

                "सगरमाथा प्राकृतिक आरक्षण क्षेत्रभित्र फ्याँकिएको फोहरलाई हटाउनुका साथै सम्पूर्ण प्राकृतिक आरक्षण क्षेत्रको वातावरणको संरक्षण गर्नु हाम्रो मुख्य लक्ष्य र दायित्व हो। यसका अतिरिक्त, हामीले सगरमाथा प्राकृतिक आरक्षण क्षेत्रको पर्यटन रेखाको व्यवस्थापनलाई पनि सबल पारेका छौं।"

                  सगरमाथा प्राकृतिक आरक्षण क्षेत्र व्यवस्थापन समिति अन्तर्गत तिंगरी शाखाले हाल सगरमाथाको पूर्वी तथा उत्तरी भाग र मुख्य शिविरमा तीनवटा फोहर संकलन केन्द्रको स्थापना गरेको छ।

                    सन 2003 देखि सगरमाथा पुग्ने सबै व्यक्तिहरुले समुद्र सतहदेखि पाँच हजार एक सय मिटरको उचाइमा पर्ने रोंपु गुम्बामा गाडी छोडेर घोडा चढेर माथि जानुपर्छ। यो विश्वको सबैभन्दा अग्लो स्थानमा पर्ने गुम्बा हो। यसबाट गाडीबाट निस्किने ग्याँसले सगरमाथा क्षेत्रमा पार्ने असरलाई कम पारिएको छ। यसका साथसाथै, स्थानीय पशुपालकहरुका लागि आम्दानी गर्ने अर्को एउटा उपाय पनि प्रदान गरिएको छ। यसबारे जानकारी दिंदै श्री फुपुचासीले भन्नुभयोः

                 "यसो गरेबाट, एकातिर हामीले सगरमाथा घुम्नजाने पर्यटकहरुलाई हाम्रो संरक्षण क्षेत्र सफा पारिएको अनुभव गराएका छौं भने, अर्कातिर सगरमाथाको पर्यावरणीय वातावरणको संरक्षण गरेका छौं। किनकि यहाँको पर्यावरणीय वातावरणमा पुर्‍याइने नोक्सानीले सारा विश्वको जल-वायुमा असर पार्नसक्छ।"