वास्तवमा श्रीमती चुंयुंग चोमा गायनको वैज्ञानिक तरिकाबाट निकै लाभान्वित हुनुहुन्छ। उहाँले पहिले शांगहाई संगीत कलेजमा अध्ययन गर्नुभयो। सम्बन्धित शिक्षा हासिल गरेपछि उहाँको स्वर अझ मीठो र गहकीलो भयो र उहाँको स्वरले तिब्बती जातिको विशेषतालाई अझ छर्लंग पार्नसक्ने भयो। हाल उहाँसँग गीत गाउन सिक्ने इच्छा गर्ने व्यक्तिहरुको संख्या पनि बढिरहेको छ। यसबारे चर्चा गर्दै उहाँले भन्नुभयोः

               "युन नान प्रान्तमा जातीय संगीत सम्बन्धी तालिमको आयोजना गर्ने विचार मैले गरेकी छु। हाम्रो युन नान प्रान्तका छब्बीसवटै जातिका विद्यार्थीलाई भर्ना गराउने मेरो योजना छ। ती हरेक जातिका एकजना विद्यार्थीलाई सिकाउनु पनि एउटा निकै राम्रो कुरा हो।"

               दक्षिण-पश्चिमी चीनको युन नान प्रान्तबाट आउनुभएका चिनियाँ जन-राजनैतिक परामर्शदात्री सम्मेलनका अर्का एकजना सदस्य वांग स ताई युन नान जातीय विश्वविद्यालयका उप-प्राध्यापक हुनुहुन्छ। श्रीमती चुंयुंग चोमा जस्तै उहाँले पनि शैक्षिक तालिममार्फत अल्पसंख्यक जातिको जातीय कलाको बिँडो थाम्ने विचार गर्नुभएको छ। चीनमा सबैभन्दा बढी अल्पसंख्यक जातिहरु बस्ने ठाउँ युन नान हो। र चीनका जम्मा पच्पन्नवटा अल्पसंख्यक जातिहरुमध्ये पच्चीसवटा अल्पसंख्यक जातिहरुको बसोबास युन नानमा रहेको छ। श्री वांग स ताईले अल्पसंख्यक जातिको संस्कृति र कलाको संरक्षणबारे अध्ययन गर्नथाल्नुभएको धेरै समय भैसकेको छ। त्यसैले उहाँमा यसबारेको उच्च ज्ञान छ। सन 1994 देखि उहाँले अल्पसंख्यक जातिको संस्कृति र कला क्षेत्रमा प्रशस्त युवा कलाकारहरुलाई हुर्काउनुभएको छ। अल्पसंख्यक जातिको संस्कृति र कलाको संरक्षणबारे चर्चा गर्दै उहाँले भन्नुभयोः

               "शैक्षिक तालिममार्फत अल्पसंख्यक जातिको संस्कृति र कलाको संरक्षण गर्ने एउटा महत्वपूर्ण तथा विवेकपूर्ण तरिका हो। हामीले अल्पसंख्यक जातिको परम्परागत कलालाई आधुनिक विद्यालय शिक्षामा समावेश गराएर त्यसलाई मुख्य पाठ्यक्रमका रुपमा बनाउनुपर्छ।"

             "गेसार महाकाव्य" तिब्बती जनताले सिर्जना गरेको महाकाव्य हो। यो विश्वको सबैभन्दा लामो महाकाव्य हो। यसमा तिब्बतीहरुका बहादुर गेसारले आफ्नो जीवनमा गरेका गौरव लाग्दा महाकार्यको बयान गरिन्छ। त्यसलाई विश्वमा महाकाव्य क्षेत्रको सम्राट भनिन्छ। हजारौं वर्षदेखियता तिब्बतीहरुको बसोबास स्थनमा "गेसार महाकाव्य"को प्रचार-प्रसार भैरहेको छ। साहित्य कलाको क्षेत्र बाहेक, इतिहास, भूगोल, जातीय रितीरिवाज र पुरातात्त्विक सर्भेक्षण आदि क्षेत्रहरुमा पनि "गेसार महाकाव्य" को ठूलो महत्व छ। तिब्बती जातिको परम्परागत चालचलनबारे अध्ययन गर्ने महाकोष हो यो।

(क्रमशः)