नेपालको भूमि चीन बिरोधी गतिविधिमा प्रयोग हुन सक्ने संभावना देखेर सरकारले सुरक्षा व्यवस्था कडा बनाएको भनिए लगत्तै चीन बिरोधी गतिविधिमा लागेका झण्डै एक सय व्यक्तिहरु पक्राउ परेका छन् ।
काठमाडौँका विभिन्न भागबाट चीन बिरोधी सभा, जुलुस र नाराबाजी गर्न खोज्ने 94 जना व्यक्तिहरु पक्राउ गरेको नेपाल प्रहरीले जनाएको छ । नेपालको भूमि प्रयोग गरेर कुनै पनि छिमेकी मित्रराष्ट्र विरुद्धमा कुनै कार्यक्रम गर्न नपाइने भएकाले उनीहरु पक्राउ परेका हुन् ।
महानगरीय प्रहरी परिसर हनुमानढोकाका प्रमुख प्रहरी उपरीक्षक राजेन्द्र श्रेष्ठले सी.आर.आई.लाई बताउनु भए अनुसार राजधानीको बौद्ध, चावहिल, स्वयंभू, जावलाखेल र चिनियाँ दूताबासको भिसा कार्यालय अगाडि कलमपोखरीबाट 94 जना व्यक्तिलाई पक्रिएको बताउनुभयो । प्रहरी उपरीक्षक श्रेष्ठका अनुसार पक्राउ पर्नेमा कथित तिब्बती शरणार्थीहरु रहेका छन् । उनीहरुले ती ठाउँहरुमा भेला भएर नेपालको छिमेकी मित्रराष्ट्र चीनका बिरुद्धमा नाराजुलुस गर्ने गरेकाले पक्राउ गरिएको उहाँले बताउनुभयो ।
मार्च महिनामा चीनको स्वायत्त प्रदेश तिब्बतमा शान्तिपूर्ण तरिकाले प्रजातान्त्रिक सुधार भएको अवसर पर्ने भएकाले वाषिकोत्सव मनाइने गरिन्छ । त्यही अवसरमा नेपाल र चीनबीचको मैत्री सम्बन्धमा बाधा पुर्याउने देशी विदेशी तत्वहरुले बिरोध गर्न सक्ने सूचना पाएपछि गृहमन्त्रालयले काठमाडौँ उपत्यकाको सुरक्षा व्यवस्थालाई कडा बनाएको छ ।
