पाकिस्तानका पूर्व सैन्य शासक तथा पूर्व राष्ट्रपति परवेज मुशर्रफ आज शुक्रबार बिहान पक्राउ परेका छन्।
उनलाई नियन्त्रणमा लिएर प्रहरीले इस्लामावादको स्थानीय अदालतमा पेश गरेको छ । प्रहरीले उनलाई इस्लामावाद नजिकैको उनकै निबासबाट नियन्त्रणमा लिएको थियो । प्रहरी घेराका बीच अदालतमा उपस्थित गराउँदा मुशर्रफ निकै चिन्तित देखिएको जनाइएको छ ।
अदालतले गत बिहीबार मात्र जमानत खारेज गर्दै मुशर्रफलाई पक्राउ गर्न आदेश दिएको थियो । सन् 2007 मा सत्तामा रहेका बेला सर्वोच्च अदालतका न्यायाधीशलाई गैर कानुनी रुपमा हिरासतमा राखेको आरोपमा अदालतले मुशर्रफलाई पक्राउ गर्न आदेश दिएको खबर छ ।
आदेश दिँदा अदालतमै उपस्थित मुशर्रफ लगतै फरार भएका थिए । उता अदालतमै रहेका बेला पक्राउ नगरेको भनी इस्लामावादका प्रहरी प्रमुखलाई आज अदालतमा उपस्थित हुन भनिएको छ।
