माथिल्लो मर्स्याङ्दी जलविद्युत् आयोजना संयुक्त रूपमा विकास गर्न जीएमआर इनर्जी लिमिटेड र विश्व बैंक समूहअन्तर्गतको अन्तर्राष्ट्रिय वित्त निगम （आईएफसी) बीच गत बिहीबार सम्झौता भएको छ।
उक्त सम्झौतापछि आयोजना बन्ने लगभग निश्चित भएको दाबी जीएमआरले विज्ञिप्ति मार्फत गरेको छ। 6 सय मेगावाटको उक्त आयोजना जीएमआर इनर्जी अन्तर्गतको हिमताल हाइड्रो पावर कम्पनीले बनाउनेछ।
यो लगानी बोर्डले सहजीकरण गरेको राष्ट्रिय प्राथमिकताप्राप्त आयोजना हो। आयोजनाको सर्वेक्षण, अनुसन्धानसम्बन्धी काम र सम्भाव्यता अध्ययन यसअघि नै सकिएको छ।
संयुक्त विकास सम्झौतामा बिहीबार हस्ताक्षर भए पनि आयोजना विकास सम्झौतामा अर्को वर्ष हस्ताक्षर हुने अपेक्षा गरिएको छ।
बिहीबारको सम्झौताअनुसार आईएफसीले 10 प्रतिशत स्वपुँजी र कुल लागतको 15 प्रतिशत कर्जा लगानी गर्नेछ। आयोजनाको अनुमानित लागत 85 अर्ब रुपैयाँ छ। 'रन अफ द रिभर' मा आधारित उक्त आयोजना निर्माण, सञ्चालन र हस्तान्तरण（बुट मोडल) मा बन्नेछ। हिमताल हाइड्रो पावरले आयोजना निर्माणका लागि बोर्डसँग विकास सम्झौता गरेपछि ऊर्जा मन्त्रालयबाट लाइसेन्स पाउनेछ। आयोजना सन् 2016 सम्म निर्माण गर्ने लक्ष्य राखिएको कान्तिपुर अनलाइनले लेखेको छ।
