नेपालकी चर्चित अधिवक्ता तथा संविधानसभा सदस्य सपना प्रधान मल्लले महिला समानताको लागि यसवर्षको 'ग्रुबर अन्तर्राष्ट्रिय महिला अधिकार अवार्ड 2008' पुरस्कार प्राप्त गर्नुभएको छ । सो कुरा अन्तर्राष्ट्रिय रूपमा ख्यातिप्राप्त 'ग्रुबर अन्तर्राष्ट्रिय महिला अधिकार अवार्ड ' यस वर्ष तीनजना अन्तर्राष्ट्रिय महिलालाई प्रदान गरिएको र त्यसमध्ये मल्ल एकजना रहनुभएको 'पिटर एन्ड प्याट्रिसिया ग्रुबर फाउन्डेसन' ले जनाएको हो।
प्रजनन् स्वास्थ्यको अधिकार तथा पैत्रिक सम्पत्तिको अधिकारमा कानुन सुधार गरी महिला अधिकारको संरक्षण गर्नमा विशेष नेतृत्व लिनुभएको र सर्वोच्च अदालतमा वकालत गरी वैवाहिक बलात्कारको कानुनी मान्यता दिलाएको र लैङ्गिक समानतासम्बन्धी कानुन ल्याउनमा उल्लेखनीय भूमिका निर्वाह गरेको भन्दै उहाँलाई सो पुरस्कार प्रदान गरिएको महिला, कानुन र विकास मञ्चले जनाएको छ।
प्राप्त समाचार अनुसार प्रधान महिला, कानुन र विकास मञ्चको पूर्वअध्यक्ष पनि हुनुहुन्छ । पुरस्कारमा सम्मानका साथ स्वर्णतक्मा तथा पाँच लाख अमेरिकी डलर राशि रहेको छ । पाँच लाख डलरको राशि भने तीनजनालाई भाग लगाइनेछ ।यस वर्ष तीनजना व्यक्तिलाई उक्त पुरस्कार दिने निर्णय गरिएको छ ।
अन्य पुरस्कृतहरूमा इराकको 'अर्गनाइजेसन अफ वुमेन्सुका' सहसंक़स्थापक यानार मुहम्मद र इजरायलमा बसोबास गरिरहनुभएका तथा प्यालेस्टाइनमा घरेलु हिंसा बिरुद्धमा काम गरेबापत डा. नादेरा शाल्हौब केभोरकियान हुनुहुन्छ । नेपालको इतिहासमा यति ठूलो अन्तर्राष्ट्रिय रूपमा मान्यता प्राप्त तथा राशि भएको पुरस्कार पाउने पहिलो नेपाली हुनुभएको पनि महिला, कानुन र विकास मञ्चले जनाएको छ ।
|