काठमाडौँमा हिजो सम्पन्न नेपाल र चीनको स्वायत्त प्रदेश तिब्बतबीचको संयुक्त पर्यटन प्रवर्द्धन समन्वय बैठकले ल्हासा र काठमाडौँबीचमा नेपाली विमान सेवाले पनि उडान गर्न सक्ने निष्कर्ष निकालेको छ। ल्हासाको गंगोर विमानस्थलबाट अन्तर्राष्ट्रिय उडानका रुपमा एकमात्र स्थान काठमाडौँमा एयर चाइनाले उडान गर्दै आएको छ।
दुवै देशको पर्यटन प्रवर्द्धन गर्न कमी कमजोरीहरु सच्याउने र सुधारका लागि संयुक्त प्रयास गर्ने सहमति गर्दै दुई दिने तेस्रो संयुक्त पर्यटन प्रवर्द्धन समन्वय बैठक हिजो काठमाडौँमा सम्पन्न भएको हो। सो बैठकमा नेपाली विमान सेवालाई काठमाडौँ ल्हासा काठमाडौँ उडानका लागि सहज बनाउने र चिनियाँ विमान सेवालाई क्यान्टन ल्हासा काठमाडौँ उडानका लागि सहज गर्ने सहमति भएको छ।
चीनको स्वायत्त प्रदेश तिब्बत पर्यटकका लागि सर्वोत्कृष्ट गन्तव्य हो। यदि नेपाली विमान कम्पनीले पनि काठमाडौँ र ल्हासाबीचमा उडान गर्न पाउने हो भने नेपाली तथा तिब्बती पर्यटन क्षेत्रले काचुली फेर्ने निश्चित छ।
यसैगरी दुई देशबीच संयुक्त रुपमा निजी क्षेत्रलाई सहभागी गराई पर्यटन प्रवर्द्धन गर्ने, लामाङथाङ्काबाट मानसरोवरसम्मको पदयात्राका लागि कार्ययोजना तयार गर्ने सहमति पनि भएको छ। सो बैठकको नेतृत्व पर्यटन तथा नागरिक उड्डयन मन्त्रालयका सहसचिव मुरारीबहादुर कार्की र तिब्बत पर्यटन प्रशासनका उपमहानिर्देशक वाङ्ग सोङ्पिङले गर्नु भएको थियो।
चेतनाथ आचार्य
सि.आर.आई.
काठमाडौँ
|